कृषि वैज्ञानिकहरूको राष्ट्रिय सम्मेलन हुँदै

काठमाडौँ । नेपाली कृषि वैज्ञानिकहरूको संस्था सोसाइटी अफ एग्रिकल्चरल साइन्टिस्ट (सास) नेपालको बृहत् छैटौँ राष्ट्रिय सम्मेलन तथा आठौँ साधारण सभा हुने भएको छ । ललितपुरमा आगामी बुधबार सो राष्ट्रिय सम्मेलन तथा आठौँ साधारण सभा हुने भएको हो । “कृषिमा रूपान्तरणका लागि अनुसन्धान प्रणाली” भन्ने नाराका साथ सो सम्मेलनमा करिब पाँच सय जनाको उपस्थिति रहनेछ । सो सम्मेलनले नेपालको कृषि अनुसन्धान प्रणालीलाई सबल र सुदृढ बनाई मुलुकको आर्थिक विकासको लक्ष्यमा योगदान पुर्याउन नीतिगत हिसाबले विशेष मार्गचित्र तयार गर्ने अपेक्षा गरिएको छ । यो सम्मेलनले वैज्ञानिकको नयाँ नेतृत्व चयन गर्नुका साथै कृषि वैज्ञानिकको हकहितको लागि आवश्यक नीति तथा योजना तर्जुमा गर्ने राष्ट्रिय कृषि प्रविधि सूचना केन्द्रका प्रमुख डा. कालिकाप्रसाद उपाध्यायले बताए ।