काठमाडौं– प्रतिनिधि सभाका सभामुख देवराज घिमिरेले जनता समाजवादी पार्टीका सांसद शहनाज रहमानको निधनप्रति दु:ख व्यक्त गरेका छन्।
सभामुख घिमिरेले एक विज्ञप्ति जारी गर्दै रहमानको असामयिक निधनप्रति शोक व्यक्त गरेका हुन्। रहमानको निधनलगत्तै सभामुख घिमिरे भक्तपुरस्थित थिमि अस्पताल पुगेका थिए।
स्व. रहमानका छोरी तथा परिवारका सदस्यसँग भेट गर्दै सभामुख घिमिरेले घटनाबारे जानकारी लिएका थिए। जनता समाजवादी पार्टीबाट समानुपातिक निर्वाचन प्रणालीबाट निर्वाचित भएकी रहमान ६३ वर्षकी थिइन्। शनिबार बिहान हृदयघाटका कारण उनको निधन भएको थियो। झापाको भद्रपुरकी स्थायी बासिन्दा रहेकी उनका श्रीमान र पाँच छोरी रहेकी छन्।
