काठमाडौँ । नेकपा माओवादी केन्द्रका केन्द्रीय सदस्य तथा अनेरास्ववियुका पूर्वअध्यक्ष रञ्जित तामाङले सुशासन, सामाजिक न्यायसहित समाजवादका लागि विचार मिल्ने शक्तिहरूबिच एकता आवश्यक भएको बताएका छन् । माओवादीसँग पार्टी एकता गर्ने निर्णय लामो समय प्रचण्डले कार्यान्वयन नभएको नेकपाले असन्तुष्टि जनाएको बेला तामाङले एकताका लागि जोड दिएका हुन् ।
२०८४ को निर्वाचनलाई २०६४ सालमा फर्काउन पनि विचार र एजेण्डा मिल्ने शक्तिहरूबिच एकता अपरिहार्य भएको बुधबार सामाजिक सञ्जाल फेसबुकमा उनले लेखेका छन् । प्रचण्ड र विप्लवको तस्बिर शेयर गर्दै तामाङले लेखेका छन्– ‘माओवादीहरुको ०८४ लाई ०६४ मा फर्काउन पुनरएकता जरुरी छ ।
विकासका लागि, समृद्धिका लागि, सुशासनका लागि भ्रष्ट्राचार विरोधिहरुको मोर्चा जरुरी छ । शासकीय सुधारका लागि, मौलिक हक कार्यान्वयनका लागि सामाजिक न्यायसहित समाजवादका लागि विचार एजेण्डा मिल्नेरूबिच सहकार्य जरुरी छ ।’ मंगलबार सम्पन्न नेकपाको केन्द्रीय समिति बैठकले एकताका लागि आफूहरूले सदासयता देखाए पनि प्रचण्ड उदासिन भएको निष्कर्ष निकालेको थियो ।
